14 Temmuz 2009
 

GAZELLER -11-

Levh-ı Mûsâ çün yüzünden sıydı açıldı nikâb

Sırr-ı tevhîdi ayân etti vü götrüldü hicâb

İstivâ sırrına yol buldu yüzünden ta ana

Cebra’îl çekti burâkı bindi gitti çün ukâb

Kâbe kavseyn degin gitti vü durmadı hemân

Gördü Hakkın yüzünü geldi dilinden bu hitâb

Âyet-i Seb’a’l-Mesân-î yüzünden buldu çün

Ümmetine dönüben dedi budur asl-ı kitâb

Kirpik ü kaşınla zülfün yedi âyet oldu çün

Bu yedi âyet su’âline ne verirsin cevâb

Fâtiha Seb’ a’l-Mesânî çün yüzünden feth ola

Rûşen ola sana bu ilm-i ledün ola savâb

Yüzüne karşı sücûd etmedi ol dîv-i racîm

Dedi kim ben oddanım ol görünür uşda türâb

Yüzüne karşı sücûdu bana müşkil görünür

Kılmadı secde ana uş yeridir nâr u azâb

Yüzüne karşı sücûdu kılmadı dîv-i racîm

Dedi ben ol zâtım anı görmemiştir uş türâb

Lâ’linin vasfını ger şerh edersen ser-be-ser

Yazmaya sına kalem âhım ile yana kitâb

Çün Nesîmîye bu Fazl açtı hidâyet kapısın

Çalınız çeng ü rebâb ü içelim nukl ü şarâb