19 Mayıs 2009
 

GAZELLER -2-

Câm-ı safâyı bize sun sâkıyâ
Kim susamış ol meye ehl-i safâ

Şol meyi kim güneş anun câmıdır
Şol ki buyurmuş ve sekâhüm Hudâ

Şol kim anun şânına oldu nüzûl
Sûre-i tâhâ ile hem hel etâ

Arş ile mâ’i bulan içer müdâm
Câm-ı âle’l-‘arşı mey-i istevâ

Kim ki bu mey-hâneye bastı kadem
Bî-ser ü pâ oldu ne ser ya ne pâ

Şâhid-i gaybî ile oldu harîf
Tâ-ebed ikilikten oldu cüdâ

Hûrile cennette makâm eyledi
Ömr-i ebed buldu vü gördü likâ

Hızr kimi içti hayât âbını
Cân u teni cümlesi oldu bekâ

Ey çemen-i ravza boyun sidresi
Hüsn ü melâhatta ruhûn müntehâ

Mesken-i ervâh saçındır saçın
Lâ’l-i lebin cânlara dârü’ş-şifâ

Zülfünü ve’l-leyl okurum her gece
Yüzünü her irtede şemsü’d-duha

Gör bu Nesîmî-nefesi kim neçe
Bûy-ı Mesîhâ kimidir cân-fezâ

Nazm-ı Nesîmî ki dürerdir adı
Gör ki ne gevher satar almaz bahâ