10 Haziran 2009
 

GAZELLER -5-

Her kimin kim reh-beridir sıdk u ihlâs u safâ

Ol durur dâreyn içinde bende-i hâs-ı Hudâ

Sâdıku’l-v’a dü’l-emîni ister isen sen bu gün

Çün bilesin sâdıku’l-kavlü’l-emîn-i Mustafâ

Cevrine sabr u tahammül eylegil müşriklerin

Neçe kim gördü resûl ile Aliyyü’l-Mürtazâ

Şerbet-i mâentahûri ister isen gam yeme

Devr elinden zehr nûş et çün Hasan hulk-ı rızâ

Ger bu gün bunda susuzluktan olur isen şehîd

Yarın andan haşr olasın bâ-Hüseyn-i Kerbelâ

Tâ’ atın fevt etme ger şeytân seni yol azdırır

Kıbleden döndürme yüzün neçe kim Zeyne’l-Abâ

Şol Muhammed Bakırı kim Hak yolundan dönmedi

Neçesi verdi hidâyet lutf-ı Allâhı ana

Ca’fer-i Sâdık merâtibin dilersen sâdık ol

Sıdk ile bu yolda kul ol bulasın menzil ulâ

Müdde-î ta’nına sabr et Mûsî-i Kâzım kim

Hakk ile ol dâ’im oldu dâ’imâ

Gel Alî Mûsâ Rızâ kimi Hakın emrini tut

Neçe kim Haktan gelir cân u gönülden ol rızâ

Hem Takî kimi vücûdun mülkünü virâne kıl

Bu fenâda fânî ol kim bulasın Haktan bekâ

Sırr-ı esmâdan haber bilmek dilersen çün Nakî

Müttekî ol müttekî ol müttekî ol bî-riyâ

Askerî kimi eger nefsin şerisin basasın

Şüphe olmasın ki sensin pâdişâh-ı dü serâ

Şol Muhammed Mehdî kimi adl edip lutf eylegil

Hiç gümânsız mesken ola cennetü’l-Me’vâ sanâ

Neçe kim kıldım nasîhat uş bu halka lîk ben

Kim kabûl etti bu va’zı buldu Haktan çok atâ

Gece gündüz zikr ü fikrim şâhid ü şem’ ü şarâb

Her zamân ü her nefes ben kâr u bârım dar-safâ

Şol Muhammed Mustafânın yüzü suyu hakkı’çin

Rahm etgil ben fakîr u miskine rûz-i cezâ

Hem bu oniki imâmın hürmeti hakkı için

Bu azâb ile beni yandırma der-nâr ey Hudâ

Çün sekâhum şerbetin içti Nesîmî der-ezel

Sırrı keşf oldu rumûzu sırr-ı zât-ı kibriyâ